உன் அடையாளங்கள் முற்றிலும் 
அழிக்கப்பட்ட அறை.
ஜன்னலோரம் கிளைதாழ்த்திச் சிரித்த
வேம்பை வெட்டியாயிற்று.
உனக்குப்பிடித்த அரக்குநிற
மெத்தை விரிப்பை
சோப்பு டப்பாவில் மீதமிருந்த
மஞ்சள் துண்டை
நம் துணிகள் பின்னிக்கிடந்த
அழுக்குக்கூடையை
குளியலறை கண்ணாடியில்
ஒட்டிவைத்த ஸ்டிக்கர் பொட்டை
நகப்பூச்சு படிந்த போர்வையை
இடம்மாறி கட்டில்காலில் விழுந்த
முத்தத்தின் கறையை
பின்புறம் உன் பற்தடம்
பதிந்த பேனாவை
அம்புக்குறியிட்டு பெயர்
கிறுக்கிவைத்த மேஜையை
எல்லாம் மாற்றியாயிற்று.
ஞாபக அறைக்கு இடம்பெயர்ந்த
மனதை எங்ஙனம் மீட்பது?!!